വള്ളിക്കുന്ന് : ഈ റമളാനിൽ 27 ദിവസങ്ങളിൽ 25 നോമ്പുകൾ പാലിച്ച ഓട്ടോ ടാക്സി & ലൈറ്റ് മോട്ടോർ വർക്കേഴ്സ് യൂണിയൻ (CITU) വള്ളിക്കുന്ന് ഏരിയ ജോയിന്റ് സെക്രട്ടറി സി. വിജയകുമാറിന് ആദരസൂചകമായി യൂണിയൻ അംഗങ്ങൾ പ്രത്യേക നോമ്പുതുറ സംഘടിപ്പിച്ചു.

സമൂഹ ഐക്യത്തിന്റെയും സൗഹൃദത്തിന്റെയും പ്രതീകമായ ഈ പരിപാടിയിൽ യൂണിയൻ പ്രവർത്തകരും നാട്ടുകാരും പങ്കെടുത്തു. വിജയകുമാറിന്റെ ആത്മാർത്ഥമായ നോമ്പുപാലനത്തെ അഭിനന്ദിച്ചുകൊണ്ട് സഹപ്രവർത്തകർ അദ്ദേഹത്തിന് ആശംസകളും നേർന്നു.

മത സൗഹൃദവും കൂട്ടായ്മയും ഉയർത്തിപ്പിടിക്കുന്ന ഇത്തരം പരിപാടികൾ സമൂഹത്തിന് നല്ല സന്ദേശമാണ് നൽകുന്നതെന്ന് പങ്കെടുത്തവർ അഭിപ്രായപ്പെട്ടു.